FLAkankre

FLA/Eleksyon 2012

 Dirije FLA avèk FLA pou FLA

Mik Wobè ARISMA : yon altènativ

Pwofesè, pèsonèl administratif ak etidyan FLA te toujou rete atache, mare, marye ak fakilte a. Nou tèlman renmen fakilte nou, nou soufri pou li, nou mouri pou li. Nou viktim par amour.

Nan tout UEH la, nou pami sa yo ki pi piti sou plan espas, lokal, bidjè elatriye. Nou pami sa yo ki bay pi piti to etidyan ki soutni memwa lè yo fini kat ane etid yo. Nou pami sa yo ki gen mwens viziblite, epi nou se sèl fakilte ki pa janm devlope filyè nan fòmasyon nou bay yo atravè bon jan depatman. Si etidyan ki diplôme nan dwa se avoka, nan Lekòl nòmal se nòmalyen, nan Fakilte agwonomi se agwonòm,  Ki sa etidyan FLA ye lè li fin diplôme ?

Sèl lè nou ranpòte lamayòl nan UEH la se 12 janvye 2010. Nou te bay plis pase 95 pousan viktim nan inivèsite leta a. Anpil moun temwaye yo te sispèk batiman an pat anfòm depi lontan, yo di yo te konn abitye santi l ap vibre, men pèsonn sanble pat janm pran yon titan pou mande esi yon jou ta gen yon kouri sa k pral rive ? Nou kapab di jodi a, 12 janvye se te rezilta yon pwosesis. Jodi a, nan sezon eleksyon sa a, se pi bèl okazyon nou genyen pou nou poze tout pwoblèm fakilte a ap konfwonte, pou nou chache ansanm wout ak mwayen pou nou rezoud yo, epi pou nou jwenn bon jan kaptenn ki pou mennen bak fakilte a.

Se pou nou mete entèlijans nou opa  pou nou pa viktim yon 12 janvye akademik. Pandan n ap salye memwa tout moun ki mouri nan FLA, pou FLA, nou di konsèy ki prale a  ak tout lòt manm FLAmi an mèsi pou sa nou gen tan fè nan ti bout tan tranzisyon an. Nou fè kwa pou nou pa janm bouke nan travay la, pa sèlman pou amelyore men pou chanje kondisyon nou, se sa sèlman ki pou retire nou nan ke kamyonnèt UEH la.

Mik Wobè ARISMA

Kandida,

Vis dwayen Afè akademik

Mik Wobè ARISMA se pwofesè Fakilte Lengwistik Aplike. Li se powèt, jounalis, ekriven, didactisyen ki fòme nan Fakilte Lengwistik Aplike (Inivèsite deta d Ayiti) ak nan Université des Antilles et de la Guyane. Li gen Metriz ak Mastè deta nan didaktik ak kominikasyon. Li se espesyalis nan kesyon elaborasyon ak pwodiksyon materyèl didaktik. Li travay kòm konsiltan nan rectora inivèsite deta d Ayiti, nan Agence universitaire de la Francophonie ak nan Ministè edikasyonal ak Fòmasyon pwofesyonèl.

Li deside pou vin Vis dwayen nan FLA pou kontinye monte wo wo drapo lengwistik la.

Ann pote kole pou FLA ak FLA nan FLA